Yes, Not Everything's fate

كنان العطار ،٣٠ سنة، سوري.
مابدي أحكي شو عملت فينا سنين الحرب،، الحمدلله خلصت بأقل الأضرار النفسية والمادية،،، وبهالسنين الحلوين.. في منهن مو حلوين.. بس حامدين وشاكرين.

درست إدارة موارد بشرية ٥ سنين، تخرجت ٢٠١٧.
بلشت شغل ٢٠١٢ ، وبشهادتي لأول مرة ٢٠١٧ ببنك الشرق.
كانت خبرة حلوة، بس مافي أي مردود حالي او بصيص أمل يخليه الشغل الي تعبت كرمالو ٥ سنين بالجامعة.
٢٠١٩ قررت أدرس ماجستير برومانيا، يعني وسافر كمان بفرد مرة، يا برجع بشهادة لبلدي، يابكفي شغل برومانيا.
ماكنت متخيل حالي سافر واتغرب...
و سافرت لرومانيا ٢٠٢٠، و كوفيد بلش، ماعد اقدرت كفي سنة اللغة، رجعت عسوريا ،، الوضع صار أصعب ب ١٠٠ مرة، ببلد بالاساس منهكة،، كان الكوفيد متل حبة الكرز ،، قررت أرجع رومانيا مرة تانية ٢٠٢١.
ورجعت
روحي تقيلة
أحلامي البسيطة مشوهة
مستقبل مابعرف كيف ممكن يكون
الأشخاص الي حوليي بقلبن هموم متلي واكتر.
وتستمر الحياة!!

كنت مجبر لاقي أيا شغل لأقدر عيش وماكون حمل ع حدا. لغتي الرومانية 2 من 10 ،الانكليزي مو كل الشعب الروماني بيستخدمها،، الشركات / البنوك مالقيت فيها اي فرصة.
ومن شغل لشغل بالغربة،، ومن هواية لهواية،، وبكل مطرح،، أشخاص جديدة منصادفها منسمع قصصها،، منسمع ضحكها ووجعها،،نجاحها وفشلها،، قصص قريبة مني،، حاسس فيها قبل بمرة،، و قصص جديدة تخليني أشكر الله.
مشيت الأيام،، مو عرفان شو ناطرني بكرى.
٢٠٢٣ مرقت فيها فترة بدون شغل، ماعد قدران لغيري اتعب.. هالفترة خلتني اسأل حالي لأول مرة بجدية وعتب، كنان شو بحب؟؟ شو بيستمتع يشتغل؟؟ صعب الجواب،، مو بالسهل يطلع، ١٠ سنين حرب كان كل همي أرجع عالبيت شوف أهلي مجتمعين.. وبالعطلة رفقاتي كاملين.. جامعتي..شغلي.. ومشاغل مابتعرف كيف بتاخدك وبتجيبك.. بس!!

والأيام بتمضى على أمل لاقي جواب.
وبيوم جبت ورقة وقلم وكتبت كل شي بعرفوا، بحب اشتغلو.. امتلأت الصفحة .. معقول في حدا بحب كل هالاشياء؟ لاء، مو بحبهن،، بعرف اشتغلن.

بس لحظة.. كنان بحب الموسيقى،، اي بس مو دارس موسيقى،، بس بستمتع بالأغاني الي كلماتها بتحرك جواتنا شي،، ولحنها بيدخلك بمودها،، بتحمسنا، بتضحكنا، بتبكينا، بتخلينا نفكر بشخص أو موقف.
بحب كتابة خواطر،، سطرين ٣ مو أكتر،، بيني وبين حالي،، بعتبرها خصوصية، لأنها خواطر حاسس فيها حتى ولو من سردة قبالي محكية.
بحب الغناء..بس مابحفظ كل الاغاني.. فقط الي بستمتع فيها وأنا عم غنيها، بسهرات العيلة ،بين أصدقائي، مو أكتر ،، نمط الأغاني الي بحبها مابيتناسب مع النمط يلي العالم بتحب تسمعوا بحفلة او سهرة،، ما كتير ركزت عالموسيقى كوسيلة أو مهنة.. مجرد هواية بس نجتمع.
وبالنسبة لوسائل التواصل الاجتماعي.. آسف، بس ماكنا كتير أصحاب.. بس أحسن من الأول النا فترة.

صار بدها حل،، هالمرة رح أبدا ، ورح سجل الي كتبتو وغني بشكل رسمي يوما ما،، عم بسمع في كتير سرقات أغاني.. مابدي شوف تعبي وفكري عم ينسرق وأستنى العدالة،، رح موت ألف مرة لحصل حقي.. رح أبدا دندن عالانستغرام.. أما الكتابة.. الأحسن خبيهن لوقتهن.. مو ناقصني أتلف أعصابي ..

وهي وقتن،، وهي انا،، وهي مختصر صغير عني ل ١٢ سنة تقريباً .. يمكن تكون قصة كتير شباب وصبايا، اتأخروا بالسؤال،، او لسا ما لاقوا جواب،، بس كل حدا عندو شي بحبو.. مجالات الحياة كتيرة وممتعة.. وهلق رح أسألك نفس السؤال ايها القارء.. انت شو بتحب ؟؟